A Tafona, Paprica e o Semáforo, novos establecementos certificados con selo de garantía Galicia Calidade

A Tafona, Paprica e o Semáforo, novos establecementos certificados con selo de garantía Galicia Calidade

08/07/2019 - 08:57

Os restaurantes A Tafona (Santiago de Compostela) e Paprica (Lugo) e o hotel-restaurante O Semáforo (Fisterra) alcanzaron a certificación do selo Galicia Calidade tras superar os requisitos establecidos pola marca de garantía da Consellería de Economía, Emprego e Industria. Trátase de tres establecementos de referencia no sector da restauración e da hostalería de Galicia recoñecidos pola calidade dos seus servizos e propostas gastronómicas. O director […]

Os restaurantes A Tafona (Santiago de Compostela) e Paprica (Lugo) e o hotel-restaurante O Semáforo (Fisterra) alcanzaron a certificación do selo Galicia Calidade tras superar os requisitos establecidos pola marca de garantía da Consellería de Economía, Emprego e Industria.
Trátase de tres establecementos de referencia no sector da restauración e da hostalería de Galicia recoñecidos pola calidade dos seus servizos e propostas gastronómicas. O director xerente de Galicia Calidade, Alfonso Cabaleiro, salientou que estas novas incorporacións veñen a completar unha oferta de establecementos de calidade que, agrupados na plataforma Lecer, ofrecen aos consumidores “unha garantía de calidade e compromiso con Galicia”.
Galicia Calidade Lecer
A plataforma Galicia Calidade Lecer agrupa establecementos de ocio, restauración e hostalería de Galicia con calidade certificada. O obxectivo de Galicia Calidade Lecer é impulsar a calidade como elemento que marque a diferencia respecto doutros destinos turísticos, xerar confianza nos consumidores e acadar maior visibilidade e valoración dos establecementos certificados.
Coas novas incorporacións, a marca de garantía de Galicia conta xa con 110 establecementos certificados, entre os que se atopan hoteis, restaurantes, casas rurais e portos deportivos. Para poder contar co selo de garantía Galicia Calidade, os establecementos deben contar tamén co selo Q de Calidade turística e ter, no caso dos restaurantes, unha oferta gastronómica con produtos avalados polos selos certificación de orixe de Galicia.
A Tafona
A Tafona é o restaurante liderado pola chef compostelana Lucía Freitas, que na última edición foi galardoada cunha estrela da Guía Michelín. Situado nunha antiga casona compostelá de 1920 combina tradición e modernidade, conceptos que tamén se aplican á súa cociña. Lucía Freitas é na actualidade unha das cociñeiras galegas de referencia. Pertencente ao Grupo Nove Cociñeiros, desenvolveu a súa traxectoria profesional no País Vasco, Barcelona e Mallorca para volver logo á súa terra natal e cumprir o seu soño de abrir un restaurante propio, A Tafona.
O Semáforo de Fisterra
O Semáforo de Fisterra localízase nunha construción de 1888 anexa ao Faro de Fisterra, que naceu co obxectivo de avisar aos navegantes da perigrosidade marítima da zona. No ano 1999 a antiga sede de vixilancia transformouse nun hotel delicatessen e restaurante con encanto. Todo o establecemento está decorado con produtos galegos gourmet.
Pola súa banda, o restaurante do Semáforo conta con unha ampla oferta gastronómica centrada nos produtos de Galicia. Trátase dunha cociña de mercado e de tempada, que recupera pratos tradicionais da zona de Fisterra baseados en produtos coma o longueirón, lumbrigante, berberechos ou as ameixas.
Paprica
O restaurante Paprica está formado por un equipo novo e dinámico liderado por Álvaro Villasante, chef cunha ampla traxectoria profesional e pertencente ao Grupo Nove Cociñeiros. Desde a súa apertura no 2007, a aposta polo equilibrio entre a cociña tradicional e moderna brindoulles varios recoñecementos, entre eles ser o primeiro restaurante de Lugo en obter a Q de Calidade Turística e a mención na Guía Michelín que manteñen ano tras ano.
A cociña do Paprica baséase en pratos creativos marcados polas estación do ano e os produtos locais de calidade. A tempada, a proximidade e os produtos ecolóxicos son as sinais de identidade deste establecemento, que aproveita ademais o seu comedor como sala de exposición a artistas locais.