PRESENTACIÓN

Parte do peirao de Rodas e transcorre, na súa maior parte, pola Illa do Faro, subindo ata o faro de Cíes. Esta ruta permite contemplar as espectaculares vistas panorámicas desde os seus dous miradoiros, ademais dos sistemas de dunas, o Lago dos Nenos, o Centro de Interpretación da Natureza ou o Observatorio de Aves.

Comeza cunha bonita panorámica da praia de Rodas desde o seu extremo norte e continúa a través do sistema de dunas de Muxieiro para chegar ao Lago dos Nenos, un lugar ideal para o refuxio e a cría de multitude de especies e unha das zonas de maior interese ecolóxico e fraxilidade do Parque Nacional. Unha vez cruzado o dique que une ambas as illas, chégase ao Centro de Interpretación da Natureza (antigo mosteiro de Santo Estevo). Neste centro pódense coñecer mellor os valores naturais e culturais do Parque.

Ao pasar a praia da Nosa Señora, comeza a subida en zigzag cara ao Faro. Entre o espeso arboredo pódese entrever, ao sur, a fermosa illa de San Martiño. A continuación, a medida que se ascende, atópase a curiosa Pedra da Campá, perforada pola forza dos ventos atlánticos cargados de salitre, e o observatorio de aves, desde o cal se pode gozar dunhas impresionantes vistas do Lago e da praia de Rodas. Por último, chégase ao faro, que é o miradoiro máis emblemático das Illas Cíes, con vistas ás tres illas, os cantís e as praias.